அல் ஹதீஸ் - ஸலவாத்தின் சிறப்புகள்

ஸலவாத்தின் சிறப்புகள்

♣ கண்மணி நாயகம் ஸல்லலாஹு அலைஹி வஸல்லம் அன்னவர்கள் கூறினார்கள்:

எவரிடமாவது என்னைப்பற்றி சொல்லப்பட்டு அவர் என் மீது ஸலவாத் ஓதவில்லையானால் அவர் கஞ்சனாவார்.

திர்மிதி - 3546, நசாயி - 9885, பைஹகி - 1566, ஹாகிம் - 2015, முஸ்னத் அஹ்மத் - 1738,

இப்னு ஹிப்பான் – 909

♣ கண்மணி நாயகம் ஸல்லலாஹு அலைஹி வஸல்லம் அன்னவர்கள் கூறினார்கள்:

எவரிடமாவது என்னைப் பற்றி கூறப்பட்டு என்மீது அவர் ஸலவாத் சொல்லவில்லையென்றால் அவர் சுவனப் பாதையை தவறவிட்டவராவார்.

தப்ரானி - 2887 , பைஹகி- 1573

♣ கண்மணி நாயகம் ஸல்லலாஹு அலைஹி வஸல்லம் அன்னவர்கள் கூறினார்கள்:

என் மீது ஸலவாத் ஓத மறந்தவர் சுவனத்து பாதையை தவறவிட்டவராவார்.

இப்னு மாஜா - 908 , தப்ரானி - 12819 , இப்னு அபீஷைபா - 31784

♣ புழாலத் இப்னு உபைத் ரலியல்லாஹு அன்ஹு அறிவிக்கிறார்கள்:

நாங்கள் நாயகம் ஸல்லலாஹு அலைஹி வஸல்லம் அன்னவர்களுடன் அமர்ந்திருந்தோம். ஒருவர் வந்தார் தொழுதார். "யா அல்லாஹ்! எனக்கு பிழை பொறுத்து கிருபை செய்வாயாக! என்று துஆ செய்தார். நாயகம் ஸல்லலாஹு அலைஹி வஸல்லம் அன்னவர்கள் கூறினார்கள், "தொழுகையாளரே! நீர் அவசரப்பட்டுவிட்டீர். நீர் தொழுது முடிந்தால் அமர்ந்து அல்லாஹ்வை புகழ்வதற்குரிய அமைப்பில் புகழ்ந்துரைத்த பின் என்மீது ஸலவாத்தும் சொல்லிய பின்பு துஆ செய்வீராக" இவருக்கு பின்னால் மற்றொரு மனிதர் வந்தார். அவர் தொழுது முடித்த பின்பு அல்லாஹ்வை புகழ்ந்து, ஸலவாத்தும் ஓதினார். அப்போது நாயகம் ஸல்லலாஹு அலைஹி வஸல்லம் அன்னவர்கள் கூறினார்கள். "தொழுகையாளரே! நீர் துஆ செய்வீராக! உமது துஆவுக்கு பதில் (பலன்) வழங்கப்படுவீர்!"

அபூதாவூத் - 1481 , திர்மிதி - 3477 , இப்னு ஹுஸைமா - 710 , இப்னு ஹிப்பான் – 1960

♣ இப்னு மஸ்ஊத் ரலியல்லாஹு அன்ஹு அறிவிக்கிறார்கள்:

நாயகம் ஸல்லலாஹு அலைஹி வஸல்லம் அன்னவர்களும், அன்னவர்களுடன் அபூபக்கர் ரலியல்லாஹு அன்ஹு, உமர் ரலியல்லாஹு அன்ஹு ஆகியோரும் அமர்ந்திருந்தனர். நான் தொழுது முடித்து உட்கார்ந்து கொண்டேன். அல்லாஹ்வைப் புகழும் வார்த்தைகளையும் நாயகம் ஸல்லலாஹு அலைஹி வஸல்லம் அன்னவர்களின் மீது ஸலவாத்தும் ஓதிய பின்பு எனக்காக துஆ செய்தேன். (இதனை செவியேற்ற) நாயகம் ஸல்லலாஹு அலைஹி வஸல்லம் அன்னவர்கள் கூறினார்கள்: "நீர் துஆ செய்வீராக, உமது துஆவுக்கு பதில் (பலன்) வழங்கப்படுவீர்."

திர்மிதி – 593

♣ கண்மணி நாயகம் ஸல்லலாஹு அலைஹி வஸல்லம் அன்னவர்கள் கூறியதாக அலி ரலியல்லாஹு அன்ஹு அவர்கள் அறிவிக்கிறார்கள்:

கண்மணி நாயகம் ஸல்லலாஹு அலைஹி வஸல்லம் அன்னவர்கள் மீது ஸலவாத் சொல்லப்படும் வரை எல்லா துஆக்களுக்கும் வானத்திற்கும் இடையில் திரை இருக்கும். ஸலவாத் ஓதப்பட்டால் அந்த திரை கிழிந்துவிடும். அந்த துஆவிற்கு பதில் (பலன்) வழங்கப்படும். ஸலவாத் ஓதப்படாவிட்டால் அந்த துஆவிற்கு பதில் (பலன்) வழங்கப்படமாட்டாது.

பைஹகி – 1576

♣ உமர் ரலியல்லாஹு அன்ஹு அறிவிக்கிறார்கள்:

(யாதொரு) துஆவும் வானுக்கும், பூமிக்கும் இடையில் தடுத்து வைக்கப்படும். உங்களது நாயகம் ஸல்லலாஹு அலைஹி வஸல்லம் அன்னவர்கள் மீது நீங்கள் ஸலவாத் ஓதும் வரை அங்கிருந்து அது (இறைசமூகம்) சென்றடையாது.

திர்மிதி - 486

♣ பாத்திமா ரலியல்லாஹு அன்ஹா அறிவிக்கிறார்கள்:

கண்மணி நாயகம் ஸல்லலாஹு அலைஹி வஸல்லம் அன்னவர்கள் பள்ளிக்குள் நுழையும் போது ஸலவாத் ஓதிய பின்பு ரப்பே! என் பாவங்களை பொறுத்தருள்வாயாக! உனது ரஹ்மத்துடைய வாயில்களை எனக்கு திறந்தருள்வாயாக என்ற துஆவினை ஓதுவார்கள். மேலும் பள்ளியிலிருந்து வெளியே வரும்போது ஸலவாத் ஓதியபின் ரப்பே! என் பிழைகளைப் பொருத்தருள்வாயாக! உனது சிறப்பின் வாயில்களை எனக்குத் திறந்தருள்வாயாக என்னும் துஆவினை ஓதுவார்கள்.

திர்மிதி - 314 , இப்னு மாஜா - 771 , பைஹகி - 67 , இப்னு அபிஷைபா - 29755 ,

முஸ்னத் அஹமத் - 25878 , 25887

♣ கண்மணி நாயகம் ஸல்லலாஹு அலைஹி வஸல்லம் அன்னவர்கள் கூறினார்கள்:

அல்லாஹ்வின் திக்ரும், என்மீது ஸலவாத்தும் ஓதாத எல்லா சபைகளும் மறுமையில் நன்மைகளை இழந்து கைசேதப்படுவதாகவே அமையும். அவர்கள் சுவனத்திற்கு சென்றாலும் சரியே.

நஸாயீ - 10242 , 10243 இப்னு ஹிப்பான் - 591 , பைஹகி - 542

♣ கண்மணி நாயகம் ஸல்லலாஹு அலைஹி வஸல்லம் அன்னவர்கள் கூறினார்கள்:

அல்லாஹ்வின் திக்ரும், என்மீது ஸலவாத்தும் ஓதாத எல்லா சபைகளும் அவர்களுக்கு நஷ்டமாகவே அமையும். அல்லாஹ் விரும்பினால் அவர்களைத் தண்டிப்பான் அல்லது மன்னிப்பான்.

திர்மிதி - 3380 , அஹ்மது - 9907