ரமலான் தரும் பதவி

​

​எழுதியவர்:  அஸீஸ் மரைக்கா காதிரி

பசித்திரு, தனித்திரு, விழித்திரு இந்த மூன்று வார்தைகளின் முதல் எழுத்தை வரிசைப்படுத்தினால் பதவி என்று வரும்.

இந்தப்பதவி வார்தைகளை வரிசைப்படுத்தினால் மட்டும் வந்துவிடாது. இம்மூன்று குணங்களையும் நம் வாழ்கையில் வரிசைப்படுத்த வேண்டும்.

மெஞ்ஞான பாதையில் பயணிப்பவர்களுக்கு ரமலான் மாதம் மிக சிறந்த மாதம். ஞானவழியில் தன் மன இச்சைகளை கட்டுப்படுத்தி பழக்குவது மிக மிக முக்கியமாக இருப்பதால் இந்த மாதம் எல்லா வகையிலும் சிறந்தது.

நோன்பு நோற்கும் ஒருவரின் உடல் நிலை பசி, தாகம், தூக்கம் இம்மூன்றும் மாற்றம் அடைவதால் அதிகமான வெப்பத்திற்கு உள்ளாகிறது. உடல் வெப்பமடைந்தால் அத்தனை உணர்வுகளும் அதிகமாகும்.

உடலில் உணர்வுகள் அதிகமாக இருக்கும்போது அவைகளை அடக்கி பழக்கி விட்டால் உடல் நிலை சாதாரணமாக இருக்கையில் மன இச்சைகளை அடக்குவது மிக எளிதாகிவிடும்.

எத்தனையோ ஞானிகள் பசியோடும் தாகத்தோடும் மாதக்கணக்கில் காடு மலைகளில் அலைந்திருக்கிறார்கள். அவர்களின் நோக்கம் அவனை அடைவது ஒன்றே என்றிருந்ததால் பசியோ தாகமோ அவர்களுக்கு தெரியவில்லை.